Pituah Rang Gaek …. Tau di nan ampek

 

Diulang-ulang baliek dek : Buya H.Mas’oed Abidin

 

Di ranah bundo Minangkabau ko ado ampek macam kato, atau caro manyampaikan parundiangan. Ado namonyo kato mandaki, dari bawah ka ateh, aratinyo dari anak-anak  ka urang tuo, dari  kamanakan  ka mamak, nan samustino mamakai caro-caro sopan santun. Talabiah-labiah bakeh urang tuo (bapak mandeh) nan alah malahiakan kito, manggadangkan jo maaja awak. Sasuai bana jo ajaran agamo Islam, kok mangecek ka mandeh nantun bapakaikan qaulan kariman, aratino kato-kato nan lamah lambuik, kato-kato nan panuah ka muliaan.

Ado pulo namono kato malereang, nan panuah ba isi kieh jo bandiang, ba isi patunjuak jo pangaja, biasonyo di pakai dalam pambicaraan antaro urang nan arih bijaksano. Ado lo tampek malatakkan kato no tu. Indak hanyo sakadar mambaco apo nan tampak sajo. Inyo indak mangecek apo nan takana, tapi labiah dahulu mangana-ngana apo nan ka di kecekkan. Buah tutua nyo panuah baisi hikmah pangajaran. Kadang-kadang batingkah jo pituah baisi patatah jo patitih. Aluih tasamek di dalam bana, ta latak di dalam hati, sajuak di kiro-kiro.  Alun bakilek nyo alah takalam.

Ado lo namono kato mandata yaitu kato bajawab gayuang basambuik samo gadang. Kadang baisi galuik jo garah, paningkah lamakno pagaulan. Indak manyingguang suok kida, panguek buhua rang mudo-mudo, abih tingkah dalam garah, kato palanta dek rang saisuk, nan elok ka pangaja, nan buruak samo di tingga an. Ingek maingek an adaik hiduik dek nan mudo, indak mampabia kawan tatungkuik, indak manuhuak kawan sairing, indak mangguntiang dalam lipatan. Baitu adaik samo gadang, disinan iduik  mangkono sero. 

Ado lo namono  kato manurun. Dari nan gadang ka nan ketek, baisi nasihaik jo pitunjuak, ka jadi padoman dek nan ketek. Panuah baisi kasih jo sayang, manjadi suri jo tauladan. Jarang ba-isi kato bangih, jauh nan dari hariak  jo berang, indak pulo mahantak kaki, jauh dari manampiak dado. 

Baitulah, kalau kato nan ampek ko lai tatap bapaguno an jadi paratian kito, Insya Allah di dalam hiduik di dunia nan fana ko kito ka salamaik, dan di akiraik tantu kita ka bahagia pulo. Salanjuikno kito dapek pulo maninggakan katurunan (generasi, kato rang kini) nan arih-bijaksano, nan bisa manjadi pamimpin di tangah-tangah kahidupan urang banyak.

Ta’jub dengan kekuasaan Allah .. Subhanallah wal hamdulillah wa laa ilaha illa Allah wa Allahu Akbar .. Labbayka Allahumma Labbayka .. Laa Syarika Laka Labbayka .. Innal hamda wan Ni’mata laka wal Mulka .. Laa Syarika Laka …

Buruak sabuik an di ranah bundo, kalau rang minang indak tau lai di nan ampek ko. Indak tau di nan bana, indak lo tau di nan salah. Indak tau di nan di suruah. Indak lo tau jo nan di tagah. Alamaik sansaro badan jadino.

Urang nan bijaksano, hanyolah nan tau di alamaik maso lalu, tau di tujuan maso datang, tau di jalan nan sadang batampuah, tau lo di tampek parantian. Baitulah handakno hiduik nangko.

Mudah-mudahan Allah Subhanahu Wa Ta’ala salalu mambimbiang kito kapado ka arifan nan alah di ajakan dek alam ta kambang nan jadi guru ko. Insya Allah.

 

Tinggalkan Balasan

Please log in using one of these methods to post your comment:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s