Tau di nan Ampek, Pelajaran adat dengan kearifan lokal.

Pituah Rang Gaek

TAU di NAN AMPEK

Di ranah bundo Minangkabau ko ado ampek macam kato-kato, atau caro manyampaikan parundiangan.

Ado namonyo kato mandaki, dari bawah ka ateh, aratinyo dari anak-anak ka urang tuo, dari kamanakan ka mamak, nan samustino mamakai caro-caro sopan santun.

Talabiah-labiah bakeh urang tuo (bapak mandeh) nan alah malahiakan kito, manggadangkan jo maaja awak.

Sasuai bana jo ajaran agamo Islam, kok mangecek ka mandeh nantun bapakaikan qaulan kariman, aratino kato-kato nan lamah lambuik, kato-kato nan panuah ka muliaan.

Ado pulo namono kato malereang, nan panuah ba isi kieh jo bandiang, baisi patunjuak jo pangaja, biasonyo di pakai dalam pambicaraan antaro urang arih bijaksano.

Ado lo tampek malatakkanno.
Indak hanyo sakadar mambaco apo nan tampak, tu.
Inyo indak mangecek apo nan takana, tapi labiah dahulu mangana-ngana apo nan ka di kecekkan.

Buah tutua nyo panuah baisi hikmah pangaja.
Kadang-kadang batingkah jo pituah jo papatah.
Aluih tasamek di dalam bana, ta latak di dalam hati, sajuak di kiro-kiro.

Ado lo namono kato mandata, kato bajawab gayuang basambuik samo gadang. Kadang baisi galuik jo garah, paningkah lamakno pagaulan. Indak manyingguang suok kida, panguek buhua rang mudo-mudo, abih tingkah dalam garah, kato palanta dek rang saisuk, nan elok ka pangaja, nan buruak samo di tingga-an.

Ingek-maingekkan adaik hiduik dek nan mudo, indak mampabia kawan tatungkuik, indak manuhuak kawan sairing, indak mangguntiang dalam lipatan.
Baitu adaik samo gadang, disinan iduik mangkono sero.

Ado lo namono kato manurun. Dari nan gadang ka nan ketek, baisi nasihaik jo pitunjuak, ka jadi padoman dek nan ketek.

Panuah baisi kasih jo sayang, manjadi suri jo tauladan. Jarang ba-isi kato bangih, jauh nan dari hariak jo berang, indak pulo mahantak kaki, jauh dari manampiak dado.

Baitulah, kalau kato nan ampek ko lai tatap jadi paratian kito, Insya Allah di dalam hiduik di dunia nan fana ko kito ka salamaik, dan di akiraik tantu kita ka bahagia pulo.

Salanjuikno kito bisa pulo maninggakan katurunan (genrerasi, kato rang kini) nan arih-bijaksano, nan bisa manjadi pamimpin di tangah-tangah kahidupan urang banyak.

Buruak sabuik di ranah bundo, kalau rang minang indak tau lai di nan ampek ko. Indak tau di nan bana, indak lo tau di nan salah.
Indak tau di nan di suruah.
Indak lo tau jo nan di tagah.
Alamaik sansaro badan jadino.

Urang nan bijaksano, hanyolah nan tau di alamaik maso lalu, tau di tujuan maso datang, tau di jalan nan sadang batampuah, tau lo di tampek parantian. Baitulah handakno hiduik nangko.

Mudah-mudahan Allah Subhanahu Wa Ta’ala salalu mambimbiang kito kapado ka arifan nan alah di ajakan dek alam ta kambang nan jadi guru ko.

Insya Allah.

Wassalamu’alaikum Warahmatullahi wa barakatuh,

Buya H. Mas’oed Abidin

About these ads

12 thoughts on “Tau di nan Ampek, Pelajaran adat dengan kearifan lokal.

  1. mantap buya….lah jarang kini anak mudo mampraktekan kato nan ampek ko di hiduiknyo…makanyo dak heran banyak salisiah yang kadangkala tajadi dek dak adonyo kato nan ampek ko…

  2. assalamu’alaikum buya………..
    tarimo kasih atas pituah nan buya buek, iko sangaik baharago bagi kami nan mudo2 ko….., sasuai bak pitua buya…kalau kami nan mudo2 ko ndak tau jo kato nan ampek alamaik ka sansaro badan ko………wassalam…

Tinggalkan Balasan

Please log in using one of these methods to post your comment:

WordPress.com Logo

You are commenting using your WordPress.com account. Logout / Ubah )

Twitter picture

You are commenting using your Twitter account. Logout / Ubah )

Facebook photo

You are commenting using your Facebook account. Logout / Ubah )

Google+ photo

You are commenting using your Google+ account. Logout / Ubah )

Connecting to %s